नदीला पाणी; निमसाखर परिसरात आनंदाचे वातावरण!

निमसाखर (ता. इंदापूर) / श्री गणेश धनवडे : अनेक दिवसांच्या प्रतीक्षेनंतर अखेर निरा नदीच्या पात्रात पाणी आल्याने निमसाखर परिसरात आनंदाचे आणि समाधानाचे वातावरण निर्माण झाले आहे. नदीतून वाहणारे पाणी पाहून शेतकरी, पशुपालक तसेच सर्वसामान्य नागरिकांच्या चेहऱ्यावर समाधान झळकताना दिसत आहे.

उन्हाळ्याच्या तीव्र झळा, घटलेली भूजल पातळी आणि पाण्याच्या टंचाईमुळे त्रस्त झालेल्या परिसराला या पाण्यामुळे मोठा दिलासा मिळाला आहे. नदीत पाणी आल्याने परिसरातील विहिरी, बोअरवेल आणि इतर जलस्रोतांच्या पाणीपातळीत वाढ होण्याची आशा व्यक्त केली जात आहे. याचा थेट फायदा शेती, पिण्याचे पाणी आणि पशुधनाला होणार असल्याने शेतकऱ्यांमध्ये विशेष उत्साहाचे वातावरण आहे.

निरा नदीचे कोरडे पडलेले पात्र पुन्हा एकदा जलमय झाल्याचे मनोहारी दृश्य पाहण्यासाठी नागरिकांनी नदीकाठावर गर्दी केली. अनेकांनी या क्षणाचे फोटो आणि व्हिडीओ सोशल मीडियावर शेअर करत आनंद व्यक्त केला. लहान मुले, युवक आणि ज्येष्ठ नागरिकांनीही नदीच्या प्रवाहाचा आनंद घेतला.

"निरा वाहू लागली, निमसाखर हसू लागले" अशा शब्दांत ग्रामस्थांनी आपल्या भावना व्यक्त केल्या. नदीतील पाण्यामुळे केवळ शेतीलाच नव्हे तर संपूर्ण परिसराच्या अर्थकारणाला आणि दैनंदिन जीवनालाही नवी ऊर्जा मिळणार असल्याचे नागरिकांचे मत आहे.

परिसरातील शेतकऱ्यांनी प्रशासनाकडे नदीत नियमित पाणी सोडण्याची मागणी केली असून भविष्यात पाण्याची उपलब्धता कायम राहावी, अशी अपेक्षाही व्यक्त केली आहे. निरा नदीत आलेल्या पाण्यामुळे निमसाखर आणि परिसरातील गावांमध्ये नवचैतन्य संचारले असून आगामी खरीप हंगामाबाबत शेतकऱ्यांच्या आशा पुन्हा पल्लवित झाल्या आहेत.