अल्पवयीन मुलींवरील संवेदनशील घटनेचा निषेध; तारदाळ गावात शांततेत ‘बंद’, नागरिकांचा उदंड प्रतिसाद.

-----------------------------

शशिकांत कुंभार

-------------------------------

तारदाळ (ता. हातकणंगले): अल्पवयीन मुलींबाबत घडलेल्या एका संवेदनशील प्रकरणामुळे हातकणंगले तालुक्यात संतापाची लाट उसळली असून, या घटनेचा निषेध म्हणून तारदाळ (ता. हातकणंगले) येथील ग्रामस्थांनी सोमवारी शांततापूर्ण एकदिवसीय बंद पाळला. नागरिकांच्या स्वयंस्फूर्त सहभागामुळे कोणताही अनुचित प्रकार न घडता हा बंद यशस्वीरीत्या पार पडला.

महात्मा ज्योतिराव फुले यांच्या पुण्यतिथीनिमित्त ग्रामपंचायत कार्यालयात त्यांच्या प्रतिमेस पुष्पहार अर्पण करून निषेध-बंदची सुरुवात करण्यात आली. त्यानंतर ग्रामस्थांनी छत्रपती शिवाजी महाराज चौकात शांततेत निदर्शने केली.

तारदाळमधील सर्व व्यावसायिक, प्रतिष्ठान चालक आणि नागरिकांनी या निषेधाला उत्स्फूर्तपणे पाठिंबा देत आपले व्यवहार स्वयंस्फूर्तीने बंद ठेवले. या बंददरम्यान कायदा व सुव्यवस्था अबाधित ठेवण्यासाठी शहापूर पोलिसांकडून विशेष सहकार्य लाभले. संपूर्ण आंदोलन अत्यंत संयमित, शिस्तबद्ध आणि कायदेशीर चौकटीत पार पडल्याची माहिती स्थानिक प्रशासनाने दिली.

या आंदोलनात तंटामुक्त समिती सदस्य, समाजसेवक, महिला व युवक मंडळांनी शांततेचा संदेश देत सक्रीय सहभाग घेतला. या बंदमध्ये रमेश नर्मदे, दत्ता मांजरे तारदाळकर, सुनील शिंदे, दादासो सुतार, रंजीत पवार, नयन कांबळे, सूर्यकांत जाधव, नितीन खोचरे, प्रमोद परीट, दगडू कांबळे, प्रवीण केरले, मार्तंड कांबळे, विकास गायकवाड, गजानन पाटील, दिनकर थोरात आदी मान्यवर मोठ्या संख्येने उपस्थित होते.