ग्रीन नेट व्यवसाय परवानगीसाठी लाचेची मागणी; जैनापूर सरपंच व मुलावर गुन्हा

 ग्रीन नेट व्यवसाय परवानगीसाठी लाचेची मागणी; जैनापूर सरपंच व मुलावर गुन्हा.

----------------

नामदेव भोसले.

-------------------

जयसिंगपूर/कोल्हापूर, दि. २७ एप्रिल — शेडनेट (ग्रीन नेट) व्यवसायासाठी ग्रामपंचायतीची परवानगी देण्यासाठी १० हजार रुपयांची लाच मागितल्याप्रकरणी जैनापूर (ता. शिरोळ) येथील सरपंच व त्यांच्या मुलाविरोधात गुन्हा दाखल करण्यात आला आहे. लाचलुचपत प्रतिबंधक विभागाच्या (ACB) कारवाईनंतर हा प्रकार उघडकीस आला.

तक्रारदार यांनी पत्नीच्या नावे “ग्रीन नेट” शेडनेट व्यवसाय सुरू करण्यासाठी ग्रामपंचायत जैनापूर येथे अर्ज केला होता. या कामासाठी सरपंच सौ. संगिता रमेश कांबळे (वय ५२) यांनी १०,००० रुपयांची लाच मागितल्याची तक्रार ACB, कोल्हापूर येथे करण्यात आली. पडताळणीदरम्यान सरपंच कांबळे व त्यांचा मुलगा निकेत कांबळे (वय ३०) यांनी तडजोडीअंती ९,००० रुपयांची लाच मागितल्याचे निष्पन्न झाले.

यानंतर ACBने सापळा कारवाई आयोजित केली. मात्र, तक्रारदाराचे काम पूर्ण झाले नसल्याने आरोपींनी पैसे स्वीकारण्यास नकार देत “काम पूर्ण झाल्यानंतर पैसे घेऊ” असे सांगितल्याचे समोर आले. तरीही लाचेची मागणी केल्याचे सिद्ध झाल्याने दोघांविरोधात जयसिंगपूर पोलीस ठाण्यात गुन्हा नोंदविण्यात आला आहे.

ही कारवाई ACB पुणे व कोल्हापूर पथकाने वरिष्ठ अधिकाऱ्यांच्या मार्गदर्शनाखाली केली.

दरम्यान, नागरिकांनी लाचेची मागणी झाल्यास त्वरित लाचलुचपत प्रतिबंधक विभागाशी संपर्क साधण्याचे आवाहन करण्यात आले आहे.