अवैध धंदे जोमात; पोलीस यंत्रणा ‘कोमात’? — कुपवाडमध्ये नागरिकांची वाढती चिंता.

-------------------

मिरज / प्रतिनिधी.

-------------------

राजू कदम

मिरज तालुक्यातील कुपवाड परिसरात काही भागांमध्ये ऑनलाइन जुगार, कथित मटका तसेच इतर अवैध व्यवहारांविषयी स्थानिक पातळीवर चर्चा रंगू लागल्याने नागरिकांमध्ये चिंतेचे वातावरण निर्माण झाले आहे. शहरातील काही गल्ली-बोळांत अशा प्रकारच्या हालचाली होत असल्याची माहिती नागरिक व सामाजिक कार्यकर्त्यांकडून अनौपचारिकरीत्या पुढे येत आहे.

नागरिकांच्या मते, झटपट पैसा मिळवण्याच्या आमिषामुळे काही युवक अशा प्रवृत्तीकडे वळत असल्याची भीती व्यक्त केली जात आहे. यामुळे आर्थिक नुकसानासोबतच सामाजिक स्तरावरही दुष्परिणाम होण्याची शक्यता व्यक्त होत आहे. विशेषतः तरुण पिढीवर याचा परिणाम होत असल्याची खंत नागरिकांनी व्यक्त केली आहे.

“अवैध धंदे जोमात आणि पोलीस यंत्रणा कोमात आहे का?” असा सवालही काही नागरिकांकडून उपस्थित केला जात आहे. मात्र, या संदर्भातील सर्व माहिती ही स्थानिक स्तरावरील चर्चांवर आधारित असून अधिकृतरित्या याची पुष्टी झालेली नाही.

दरम्यान, कुपवाड पोलीस ठाण्याच्या कार्यक्षेत्रात अशा प्रकारचे व्यवहार सुरू आहेत का, याची वस्तुस्थिती तपासण्यासाठी संबंधित यंत्रणांनी सखोल चौकशी करावी, अशी मागणी होत आहे. पोलीस प्रशासनाने यापूर्वी अवैध धंद्यांविरोधात कारवाया केल्याचे नागरिक मान्य करतात; मात्र सध्याच्या चर्चांच्या पार्श्वभूमीवर वरिष्ठ अधिकाऱ्यांनी विशेष मोहीम राबवून परिस्थिती स्पष्ट करावी, अशी अपेक्षा व्यक्त केली जात आहे.

सदर वृत्त हे नागरिकांकडून प्राप्त झालेल्या माहितीसह स्थानिक पातळीवरील चर्चांवर आधारित असून, संबंधित यंत्रणांनी अधिकृत पडताळणी करून वस्तुस्थिती स्पष्ट करणे आवश्यक आहे.

भाग एक क्रमशः वाचा पुढील भागात अवैध धंद्याविषयी आणखी काही घडामोडी