हुपरीतील शनिवार आठवडी बाजारामुळे वाहतूक कोंडीचा प्रश्न गंभीर.

 हुपरीतील शनिवार आठवडी बाजारामुळे वाहतूक कोंडीचा प्रश्न गंभीर.

----------------------------

हुपरी प्रतिनिधी 

सचिन कुंभार

9021281100

----------------------------

अल्पवयीन वाहनचालकांमुळे अपघाताचा धोका; वाहतूक पोलिसांकडून कारवाईची नागरिकांची मागणी.

हुपरी : हुपरी शहरात दर शनिवारी भरणाऱ्या आठवडी बाजारामुळे शहरातील प्रमुख रस्त्यांवर मोठ्या प्रमाणात वाहतूक कोंडी होत असून नागरिक, वाहनधारक तसेच पादचाऱ्यांना मोठ्या गैरसोयीचा सामना करावा लागत आहे. त्यातच बाजाराच्या गर्दीत काही अल्पवयीन मुले दुचाकी व इतर वाहने चालवत असल्याचे चित्र दिसून येत असल्याने अपघाताचा धोका वाढला आहे. या प्रकाराकडे संबंधित विभागाने गांभीर्याने लक्ष देऊन ठोस कारवाई करावी, अशी मागणी नागरिकांतून होत आहे.

    शनिवारच्या आठवडी बाजारासाठी हुपरी शहरासह परिसरातील नागरिक मोठ्या संख्येने येतात. बाजारातील विक्रेत्यांचे हातगाडे, दुकाने, खरेदीसाठी आलेली वाहने आणि रस्त्याच्या कडेला होणारी अनधिकृत पार्किंग यामुळे अनेक ठिकाणी वाहतुकीचा वेग मंदावतो. काही वेळा वाहनांच्या लांबच लांब रांगा लागून वाहतूक कोंडी निर्माण होते.

     विशेष म्हणजे, गर्दीच्या रस्त्यांवर अल्पवयीन मुले दुचाकी चालवताना आढळून येत असल्याने पालकांसह वाहनचालकांमध्येही चिंता व्यक्त होत आहे. वाहतुकीचे नियम आणि वाहन चालविण्याचा अनुभव नसलेल्या अल्पवयीनांकडून वाहन चालविले गेल्यास स्वतःसह इतरांच्या जीवितास धोका निर्माण होऊ शकतो.

शनिवारच्या बाजाराच्या दिवशी वाहतूक नियोजन, बेशिस्त पार्किंगवर नियंत्रण आणि अल्पवयीनांकडून वाहन चालविण्याच्या प्रकारांवर विशेष तपासणी मोहीम राबवावी. तसेच नियमांचे उल्लंघन करणाऱ्यांवर कायद्यानुसार कारवाई करावी, अशी मागणी नागरिकांतून होत आहे.

हुपरी शहरातील आठवडी बाजार हा नागरिकांच्या दैनंदिन गरजांसाठी महत्त्वाचा असला तरी त्यातून वाहतूक व्यवस्था विस्कळीत होऊ नये, यासाठी नगरपालिका, पोलीस व वाहतूक विभागाने समन्वयाने कायमस्वरूपी उपाययोजना करणे गरजेचे असल्याचे नागरिकांचे म्हणणे आहे.