🌿 शेतात पिकवला गांजा; २२ झाडांसह शेतकरी पोलिसांच्या जाळ्यात!

 🌿 शेतात पिकवला गांजा; २२ झाडांसह शेतकरी पोलिसांच्या जाळ्यात!जनुना शेतशिवारात एलसीबीची धडक कारवाई; २४ हजारांचा मुद्देमाल जप्त.

सिद्धार्थ कदम | पुसद तालुका प्रतिनिधी

पुसद : जनुना शेतशिवारात शेतामध्ये गांजाची झाडे लागवड केल्याची गुप्त माहिती मिळताच यवतमाळ स्थानिक गुन्हे शाखेने धडक कारवाई केली. या कारवाईत गांजाची तब्बल २२ झाडे जप्त करण्यात आली असून, संतोष किसन लोहटे (वय ३५, रा. जनुना, ता. पुसद) याच्याविरुद्ध पुसद ग्रामीण पोलीस ठाण्यात NDPS कायद्यान्वये गुन्हा दाखल करण्यात आला आहे.

यवतमाळ जिल्ह्यात अवैध धंदे, अमली पदार्थांची तस्करी तसेच गंभीर गुन्ह्यांना आळा घालण्यासाठी पोलीस अधीक्षक कुमार चिंता यांच्या आदेशानुसार स्थानिक गुन्हे शाखेकडून कारवाईची मोहीम सुरू आहे.

दरम्यान, २४ सप्टेंबर २०२६ रोजी स्थानिक गुन्हे शाखेच्या पुसद कॅम्प पथकाला जनुना शेतशिवारात गांजाची लागवड केल्याची गोपनीय माहिती मिळाली. वरिष्ठ अधिकाऱ्यांना माहिती देऊन पथकाने पंचांसमक्ष सापळा रचत छापा टाकला. यावेळी संतोष लोहटे याच्या ताब्यातील शेतात गांजाची २२ झाडे आढळून आली. या झाडांची अंदाजे किंमत २४ हजार रुपये असल्याचे पोलिसांनी नमूद केले आहे.

सदर मुद्देमाल पंचांसमक्ष जप्त करण्यात आला असून, लोहटे याच्याविरुद्ध अंमली औषधी व मनःप्रभावी पदार्थ अधिनियम, १९८५ मधील कलम ८(ब), २०(अ)(i) अन्वये पुसद ग्रामीण पोलीस ठाण्यात गुन्हा नोंदवून कायदेशीर कारवाई करण्यात आली आहे.

ही कारवाई पोलीस अधीक्षक कुमार चिंता, अपर पोलीस अधीक्षक अशोक थोरात, उपविभागीय पोलीस अधिकारी अमर मोहिते आणि स्थानिक गुन्हे शाखेचे पोलीस निरीक्षक सतीश चवरे यांच्या मार्गदर्शनाखाली करण्यात आली.

स्थानिक गुन्हे शाखेने अमली पदार्थ व अवैध धंद्यांविरोधातील कारवाई सुरूच ठेवणार असल्याचे सांगितले असून, अशा प्रकारची माहिती नागरिकांनी पोलिसांना द्यावी, असे आवाहन करण्यात आले आहे.