🚨 राधानगरी पोलिसांचा मोठी कारवाई! 🚨 १३ चोरीच्या मोटारसायकलींसह एक चोरटा अटकेत – २.५० लाखांचा मुद्देमाल जप्त

🚨 राधानगरी पोलिसांचा मोठी कारवाई! 🚨

१३ चोरीच्या मोटारसायकलींसह एक चोरटा अटकेत – २.५० लाखांचा मुद्देमाल जप्त.

राधानगरी (विजय बकरे) :

राधानगरी पोलिसांनी अत्यंत कौशल्यपूर्ण कारवाई करत मोटारसायकल चोरीच्या टोळीचा पर्दाफाश केला आहे. युवराज उर्फ विनायक साताप्पा कांबळे (वय ३६, रा. नरतवडे, ता. राधानगरी) या इसमाकडून तब्बल १३ चोरीच्या मोटारसायकली हस्तगत करण्यात पोलिसांना यश आले आहे. जप्त वाहनांची एकूण किंमत अंदाजे २ लाख ५० हजार रुपये इतकी आहे.

ट्रॅफिक पोलिस अंमलदार रणधीर वरोटे (ब.नं. २३७७) यांना या इसमाकडे चोरीच्या मोटारसायकली असल्याची गुप्त माहिती मिळताच राधानगरी पोलीस ठाण्याचे निरीक्षक संतोष गोरे यांच्या मार्गदर्शनाखाली विशेष तपास पथक तयार करण्यात आले.

या पथकात सहा. फौजदार पारळे, पोहेकॉ खामकर, शेळके, वरोटे, पोवार, पाटील, गुरव, किरण पाटील, भोपळे, बरगे आणि चालक गुरव यांनी सहभाग घेतला. या पथकाने गुप्त माहितीच्या आधारे धाड टाकत युवराज कांबळे याला ताब्यात घेऊन चौकशी केली असता, त्याने कोल्हापूर शहरातील विविध भागांतून मोटारसायकली चोरी केल्याचे कबूल केले.

तपासात उघड झाले की, या आरोपीविरुद्ध जुना राजवाडा पोलीस ठाणे येथे ४ आणि शाहूपुरी पोलीस ठाण्यात ४ असे एकूण ८ गुन्हे आधीच दाखल आहेत. उर्वरित ५ गाड्यांची आरटीओ माहिती अपूर्ण असल्याने त्यांच्या मालकांचा शोध सुरू आहे.

सदर आरोपीला पुढील तपासासाठी शाहूपुरी पोलिसांच्या ताब्यात देण्याची प्रक्रिया सुरू असून, या कारवाईमुळे कोल्हापूर जिल्ह्यातील मोटारसायकल चोरीच्या अनेक गुन्ह्यांचे धागेदोरे मिळण्याची शक्यता आहे.

👉 राधानगरी पोलिसांच्या या धडाकेबाज कारवाईचे सर्वत्र कौतुक होत आहे! 👏