चिखलात उतरले विद्यार्थी; अनुभवली शेतीची खरी शाळा!
चिखलात उतरले विद्यार्थी; अनुभवली शेतीची खरी शाळा!
‘एक दिवस बळीराजासाठी’ उपक्रमातून विद्यार्थ्यांनी घेतला भात रोपलागवडीचा प्रत्यक्ष अनुभव.
शाहुवाडी : पुस्तकी ज्ञानासोबतच प्रत्यक्ष अनुभवातून शिक्षण मिळावे, ग्रामीण संस्कृती आणि शेतीचे महत्त्व विद्यार्थ्यांना समजावे, या उद्देशाने विद्यामंदिर सावर्डी येथे ‘एक दिवस बळीराजासाठी’ हा अनोखा उपक्रम उत्साहात राबविण्यात आला. यावेळी विद्यार्थ्यांनी चक्क चिखलात उतरून भात रोपलागवडीत सहभाग घेत शेतीची खरी शाळा अनुभवली.
शेतकरी बांधवांसोबत विद्यार्थ्यांनी भाताची तरू काढणे, रोपे लावणे तसेच शेतीतील विविध कामांचा प्रत्यक्ष अनुभव घेतला. चिखलात उतरून रोपलागवड करताना विद्यार्थ्यांच्या चेहऱ्यावर दिसणारा उत्साह आणि आनंद पाहण्यासारखा होता.
शेती हा देशाचा कणा असून अन्नदात्या शेतकऱ्यांच्या कष्टांची जाणीव विद्यार्थ्यांना व्हावी, श्रमप्रतिष्ठेचे महत्त्व समजावे आणि निसर्गाशी त्यांचे नाते अधिक दृढ व्हावे, या उद्देशाने हा उपक्रम आयोजित करण्यात आला. प्रत्यक्ष शेतात काम करताना विद्यार्थ्यांनी शेतकऱ्यांच्या कष्टांची जवळून ओळख करून घेतली आणि बळीराजाप्रती कृतज्ञता व्यक्त केली.
या उपक्रमातून विद्यार्थ्यांना केवळ भात रोपलागवडीचा अनुभव मिळाला नाही, तर श्रम, शेती आणि निसर्ग यांचे महत्त्व प्रत्यक्ष कृतीतून शिकण्याची अनोखी संधी मिळाली.
मुख्याध्यापक आनंदा काशीद, शिक्षकवृंद तसेच शेतकरी बांधव यांच्या मार्गदर्शनाखाली हा उपक्रम यशस्वीरीत्या पार पडला. विद्यार्थ्यांच्या उत्स्फूर्त सहभागाचे उपस्थितांनी कौतुक केले.
🌱 ‘एक दिवस बळीराजासाठी’ — विद्यार्थ्यांसाठी रोपलागवडीचा अनुभव नव्हे, तर आयुष्यभर लक्षात राहणारा श्रमसंस्कार!
No comments: