राधानगरी धरण ७८% भरले; सात स्वयंचलित दरवाज्यांना पाणी! अवघे १० फूट बाकी, लवकरच पूर्ण क्षमतेकडे वाटचाल.

~~~~~~~~~~~~~~~~~~~~~~~~

राधानगरी | प्रतिनिधी : विजय बकरे.

~~~~~~~~~~~~~~~~~~~~~~~~

सह्याद्रीच्या कुशीत गेल्या सहा दिवसांपासून सुरू असलेल्या मुसळधार पावसाने राधानगरी धरणाच्या जलसाठ्यात झपाट्याने वाढ झाली असून, धरण आता पूर्ण क्षमतेने भरण्याच्या अगदी उंबरठ्यावर पोहोचले आहे. सध्या धरण ७८ टक्के भरले असून, पूर्ण क्षमतेपर्यंत पोहोचण्यासाठी अवघे १० फूट पाणी आवश्यक आहे. विशेष म्हणजे, धरणाच्या सात स्वयंचलित दरवाज्यांजवळ पाणी पोहोचल्याने धरण लवकरच ओव्हरफ्लोच्या दिशेने वाटचाल करत असल्याचे चित्र निर्माण झाले आहे.

पाटबंधारे विभागाच्या माहितीनुसार, धरणाची पाण्याची पातळी ३३६.९५ फूट इतकी झाली असून, ६,४९३.१० दशलक्ष घनफूट इतका पाणीसाठा झाला आहे. सोमवारी सायंकाळी ४ ते मंगळवारी सकाळी ६ या अवघ्या १४ तासांत १०७ मिलिमीटर पावसाची नोंद झाली. तर १ जून ते २१ जुलै २०२६ या कालावधीत धरण परिसरात एकूण २,००८ मिलिमीटर पाऊस झाला आहे.

सततच्या मुसळधार पावसामुळे धरणात मोठ्या प्रमाणात पाण्याची आवक सुरू असून भोगावती नदीचा प्रवाहही वेगाने वाढत आहे. हवामान खात्याने पश्चिम घाटात आणखी पावसाचा अंदाज वर्तवल्याने राधानगरी धरण येत्या काही दिवसांत पूर्ण क्षमतेने भरण्याची शक्यता अधिक बळावली आहे.

दरम्यान, धरणातील वाढता जलसाठा लक्षात घेता नदीकाठच्या गावांतील नागरिकांनी सतर्क राहावे आणि प्रशासनाच्या सूचनांचे पालन करावे, असे आवाहन करण्यात आले आहे.