हुपरीत रिपब्लिकन पार्टीचा सत्ता संपादन मेळावा – आठवले साहेबांच्या लढाऊ परंपरेतून जिल्हा परिषदेवर मोर्चा!

--------------------------------

देवदास कांबळे

--------------------------------

हुपरी, दि. १४ सप्टेंबर २०२५ : ऐतिहासिक हुपरी शहरात उद्या होणारा रिपब्लिकन पार्टी ऑफ इंडिया (आठवले गट) चा सत्ता संपादन मेळावा राजकीय समीकरणे ढवळून काढणारा ठरणार आहे. जिल्हाभरातून हजारोंच्या संख्येने कार्यकर्ते, पदाधिकारी आणि नागरिक या मेळाव्यास उपस्थित राहणार असून, येणाऱ्या जिल्हा परिषद व पंचायत समिती निवडणुकांच्या पार्श्वभूमीवर हा मेळावा विशेष महत्त्वाचा मानला जात आहे.

रामदास आठवले यांची लढाऊ परंपरा : रिपब्लिकन पार्टीचे राष्ट्रीय अध्यक्ष व केंद्रीय सामाजिक न्याय राज्यमंत्री रामदास आठवले यांच्या संघर्षमय कारकीर्दीची उजळणी या मेळाव्यात होणार आहे. १९८० च्या दशकात दलित, वंचित आणि शोषित समाजाच्या हक्कांसाठी आंदोलने करून त्यांनी आपली राजकीय कारकीर्द सुरू केली. महाराष्ट्र विधानपरिषदेपासून सामाजिक कल्याणमंत्री, नंतर संसद सदस्य, आणि आज राज्यमंत्री या पदापर्यंतचा प्रवास त्यांच्या लढाऊ वृत्तीमुळे शक्य झाला. सामाजिक न्यायासाठी लढा, आरक्षणांचे रक्षण, दलित-आंबेडकरी चळवळ जोपासणे आणि संसदेतून रस्त्यावर कार्यकर्त्यांचा आवाज पोहोचवणे – हा आठवले साहेबांच्या चळवळीचा इतिहास आहे.

उत्तम दादा कांबळे यांचे जिल्हा नेतृत्व .

जिल्हाध्यक्ष उत्तम दादा कांबळे यांनी गावोगाव संघटना उभी करून पक्षाला बळकट केले. जिल्ह्यातील कार्यकर्त्यांना एकत्र आणत पक्षाला बळ देणे ही त्यांची कामगिरी आहे. सत्ता संपादन मेळावा म्हणजे त्यांच्या मेहनतीचे फळ असे मानले जाते.

मंगलराव माळगे यांची बांधिलकी.

मेळाव्याचे आयोजक मंगलराव माळगे यांनी पक्षासाठी केलेले संघटनात्मक काम आणि सामाजिक बांधिलकी सर्वत्र मान्य आहे. त्यांनी सामान्य कार्यकर्त्यांना एकत्र आणत पक्षाला तळागाळात पोहोचवले.

सत्ता संपादनाची गरज : कार्यकर्त्यांचा ठाम संदेश आहे की जिल्हा परिषद व पंचायत समितीमध्ये रिपब्लिकन पार्टीला हक्काच्या जागा मिळाल्याशिवाय दलित, गोरगरिब, शेतकरी व वंचितांचा विकास शक्य नाही. सत्ता हस्तगत केल्याशिवाय जनतेचा आवाज प्रभावीपणे पोहोचणार नाही.

हुपरीतून ऐतिहासिक घोषणा : “जिल्ह्यात रिपब्लिकन पार्टीला योग्य प्रतिनिधित्व मिळाल्याशिवाय जनता स्वस्थ बसणार नाही,” असा घोष कार्यकर्त्यांनी दिला. या मेळाव्यामुळे आगामी निवडणुकांचे वातावरण तापण्यास सुरुवात झाली आहे.