' सोन्या ' बैलाच्या ऋणातून मुक्त होण्यासाठी त्यांनी केले उत्तरकार्यासह अन्नदान.
' सोन्या ' बैलाच्या ऋणातून मुक्त होण्यासाठी त्यांनी केले उत्तरकार्यासह अन्नदान.
-----------------------------------
मुरगूड प्रतिनिधी
जोतीराम कुंभार
-----------------------------------
मुरगूड येथील देशमुख कॉलनीत राहणाऱ्या मारूती शंकर चौगले या शेतकऱ्यांच्या कुटुंबाचा अविभाज्य घटक बनलेल्या व त्याच्यावर जिवापाड प्रेम करीत असलेल्या ' सोन्या ' नावाच्या बैलाचा मृत्यू झाला . सारे कुटुंब शोकाकुल झाले . त्याच्या ऋणातून मुक्त होण्यासाठी फोटो पूजन व उत्तरकार्य विधीसह अन्नदान करीत शेवट गोड करण्याचा प्रयत्न चौगले कुटुंबीय करीत आहेत . चौगले कुटुंबाचे प्राण्याप्रती असलेल्या प्रेमाबद्दल परिसरातून कौतुक होत आहे .
येथील देशमुख कॉलनीत राहणाऱ्या मारूती शंकर चौगले या शेतकऱ्यांनी १४ वर्षापूर्वी मुरगूडच्या जनावरांच्या बाजारातून बैल खरेदी करून घरी आणला होता . शेती कामासाठी आणलेल्या बैलाचा अल्पावधीतच पत्नी सविता , मुलगी सुप्रिया , मुलगे विघ्नेश व ओंकार यांना लळा लागला . तसे त्याचे सोन्या असे नामकरणही झाले . तसा सोन्या परिसरातील सर्वांचाच लाडका झाला होता . असा हा सोन्या वयोमानानुसार स्वर्गवाशी झाला . अन त्याच्यावर जिवापाड प्रेम करणाऱ्या चौगले कुटुंबात शोककळा पसरली . लाडक्या सोन्याला निरोप देण्यासाठी त्याचा घराशेजारील मोकळ्या जागेत दफनविधी करण्यात आला . सोन्या बैलानेही चौगले कुटुंबांच्या शेतीची सेवा करीत त्यांच्या भरभराटीत खारीचा वाटा उचलला आहे . अशा या सोन्याच्या ऋणातून उतराई होण्यासाठी तसेच इतरांनीही प्राण्याप्रती प्रेम जोपासावे म्हणून सोन्या बैलाचे फोटो पूजनासह उत्तर कार्य विधी करीत अन्नदान करण्यात येणार असल्याचे मारुती चौगले यांनी सांगितले .
Comments
Post a Comment