हुपरी, सांगवडे परिसरात बिबट्याचे दर्शन; नागरिकांना सतर्कतेचा इशारा.

 हुपरी, सांगवडे परिसरात बिबट्याचे दर्शन; नागरिकांना सतर्कतेचा इशारा.

---------------------------

सलीम शेख 

---------------------------

कोल्हापूर : हुपरी, सांगवडे, पट्टणकोडोली परिसरात बिबट्याचे दर्शन झाल्याने नागरिकांमध्ये भीतीचे वातावरण निर्माण झाले आहे. आज, १० सप्टेंबर रोजी रात्रीच्या सुमारास हुपरी गावाबाहेर माळी पेट्रोल पंपाजवळून इंगळी रोडच्या दिशेने काही गावकऱ्यांना बिबट्या दिसल्याचे त्यांनी सांगितले.

प्रत्यक्षदर्शींनी दिलेल्या माहितीनुसार, बिबट्याने गावाबाहेरील ओढ्यावरून उडी मारून पलीकडील अंबिकानगरच्या शेताकडे धाव घेतली. त्यामुळे या भागातील शेतकरी आणि नागरिकांनी सतर्क राहावे, असा इशारा देण्यात आला आहे.

गेल्या काही दिवसांपासून कोल्हापूर जिल्ह्याच्या ग्रामीण भागात बिबट्याचे दर्शन होत असल्याच्या घटनांमध्ये वाढ झाली आहे. बिबट्या साधारणपणे रात्रीच्या वेळी भक्ष्य शोधण्यासाठी बाहेर पडतो. त्यामुळे नागरिकांनी रात्री-अपरात्री घराबाहेर पडताना विशेष काळजी घ्यावी. तसेच, पाळीव जनावरांना गोठ्यात सुरक्षित ठेवण्याचे आवाहनही करण्यात आले आहे. वनविभागाने या भागात तातडीने बिबट्याचा शोध घेऊन त्याला पकडण्यासाठी पिंजरा लावावा, अशी मागणी स्थानिकांनी केली आहे.

नागरिकांसाठी महत्त्वाच्या सूचना:

रात्रीच्या वेळी घराबाहेर एकटे जाणे टाळा.

लहान मुलांना घराबाहेर खेळू देऊ नका.

पाळीव प्राणी आणि जनावरांना सुरक्षित ठिकाणी ठेवा.

बिबट्या दिसल्यास त्याला डिवचण्याचा प्रयत्न करू नका, लगेच वनविभागाला माहिती द्या.

शेतात काम करताना सावधगिरी बाळगा.