सुसाट समृद्धी महामार्गावर बसणार १५०० सीसीटीव्ही कॅमेरे; नागपूर ते मुंबई दरम्यान ‘वॉच’ सुरू — चोरट्यांनो सावधान, सुसाट वाहनचालकांवर होणार कारवाई

 सुसाट समृद्धी महामार्गावर बसणार १५०० सीसीटीव्ही कॅमेरे; नागपूर ते मुंबई दरम्यान ‘वॉच’ सुरू — चोरट्यांनो सावधान, सुसाट वाहनचालकांवर होणार कारवाई.

------------------------------

फ्रंट लाईन न्यूज महाराष्ट्र

प्रतिनिधी – पी. एन. देशमुख, 

अमरावती जिल्हा.

-----------------------

अमरावती : राज्यातील सर्वात महत्त्वाचा आणि आधुनिक महामार्ग ठरलेला हिंदुहृदयसम्राट बाळासाहेब ठाकरे महाराष्ट्र समृद्धी महामार्ग आता पूर्णतः सीसीटीव्ही नजरेखाली येणार आहे. नागपूर ते मुंबई या ७०१ किलोमीटर अंतरावर १५०० अत्याधुनिक सीसीटीव्ही कॅमेरे बसविण्याचे काम जोरात सुरू असून, त्यामुळे महामार्गावरून जाणाऱ्या प्रत्येक वाहनावर आता सतत लक्ष ठेवले जाणार आहे.

राज्याच्या दळणवळण व्यवस्थेचा कणा बनलेल्या या महामार्गावर वाहनचालकांचा वेग आणि सुरक्षा दोन्ही महत्त्वाचे ठरत आहेत. गुळगुळीत, अडथळारहित रस्त्यांमुळे अनेक वाहनचालक वेगमर्यादा मोडतात, ज्यामुळे अपघातांचे प्रमाण वाढले आहे. सध्या दरमहा सुमारे ३ लाखांहून अधिक लहान-मोठी वाहने समृद्धी महामार्गावरून प्रवास करतात.

वाहनांच्या वाढत्या संख्येचा आणि अपघातांचा विचार करून राज्य सरकार आणि महामार्ग प्राधिकरणाने सीसीटीव्ही नियंत्रण यंत्रणा उभारण्याचा निर्णय घेतला आहे. दिल्लीस्थित एनसीसी कंपनी या कॅमेर्‍यांच्या स्थापनेचे काम पाहत असून, प्रत्येक कॅमेरा ५०० मीटर समोर आणि २०० मीटर बाजूला नजरेखाली ठेवण्याची क्षमता असणार आहे. म्हणजेच, प्रत्येक कॅमेरा दोन्ही बाजूंनी जवळपास १ किलोमीटर परिसराचे निरीक्षण करू शकेल.

या कॅमेर्‍यांच्या स्थापनेनंतर महामार्गावरील वाहनांचा वेग, अपघातस्थळाचे अचूक ठिकाण आणि संशयास्पद हालचाली यांचा तात्काळ मागोवा घेता येणार आहे. प्रत्येक जिल्ह्याच्या हद्दीत स्वतंत्र कंट्रोल रूम तयार केली जाणार असून, यापैकी मुंबई हे प्रमुख (मुख्य) कंट्रोल रूम असेल.

महामार्गावर अपघात झाल्यास ही प्रणाली कंट्रोल रूमला तात्काळ अलर्ट पाठवेल आणि नेमके ठिकाण दाखवेल. यामुळे मदतपथकाला जलद पोहोचता येईल आणि अपघातग्रस्तांना त्वरित मदत मिळेल. सध्या अपघातानंतर अचूक ठिकाण सांगणे वाहनधारकांना अवघड जात होते, कारण समृद्धी महामार्ग ग्रामीण वसाहतींपासून दूर आहे. आता ही समस्या दूर होणार आहे.

महामार्गावरील वेगमर्यादा —

हलक्या वाहनांसाठी : १२० किमी/तास

जड वाहनांसाठी : ८० किमी/तास

या मर्यादा ओलांडणाऱ्या वाहनांवर स्वयंचलित दंडात्मक कारवाई होणार आहे. याशिवाय महामार्गावर होणाऱ्या चोरी, अपघात, अथवा संशयास्पद हालचालींवर तात्काळ लक्ष ठेवले जाईल.

नागपूर ते वाशिम या पट्ट्यात काही ठिकाणी कॅमेरे बसविण्याचे काम पूर्ण झाले असून, लवकरच संपूर्ण महामार्गावर हे जाळे तयार होणार आहे.

समृद्धी महामार्ग ‘गेम चेंजर’ ठरला असला, तरी आता तो ‘सुरक्षित समृद्धी महामार्ग’ बनविण्याकडे सरकारने ठोस पाऊल टाकले आहे. या निर्णयामुळे प्रवासी आणि वाहनचालकांची सुरक्षा अधिक मजबूत होणार आहे. 🚗📹