नसरापूर प्रकरणाचा ऐतिहासिक निकाल! चिमुकलीवरील अत्याचार-हत्येतील दोषीला फाशी; पुणे सत्र न्यायालयाचा कडक निर्णय.
नसरापूर प्रकरणाचा ऐतिहासिक निकाल!
चिमुकलीवरील अत्याचार-हत्येतील दोषीला फाशी; पुणे सत्र न्यायालयाचा कडक निर्णय...
संपूर्ण राज्याला हादरवून सोडणाऱ्या नसरापूर येथील चिमुकलीवरील लैंगिक अत्याचार व हत्या प्रकरणात पुणे जिल्हा सत्र न्यायालयाने सोमवारी ऐतिहासिक आणि कठोर निर्णय देत दोषी भीमराव कांबळे याला फाशीची शिक्षा सुनावली. न्यायालयाने हा गुन्हा "दुर्मिळातील दुर्मिळ" (Rarest of Rare) स्वरूपाचा असल्याचे स्पष्ट करत मृत्युदंडाची शिक्षा जाहीर केली.
या प्रकरणात आरोपीला अपहरण, लैंगिक अत्याचार, हत्या तसेच संबंधित कायद्यांतील विविध कलमांखाली दोषी ठरवण्यात आले होते. शिक्षेबाबत सरकारी आणि बचाव पक्षाचा युक्तिवाद ऐकल्यानंतर न्यायालयाने गुन्ह्याचे भीषण स्वरूप, पीडितेचे अल्पवय आणि आरोपीच्या कृत्याचे क्रौर्य लक्षात घेऊन फाशीची शिक्षा सुनावली.
सरकारी पक्षाने सादर केलेले ठोस पुरावे, वैज्ञानिक तपास आणि साक्षीदारांच्या जबाबांच्या आधारे आरोपीचा गुन्हा न्यायालयात सिद्ध झाला. न्यायालयाने या गुन्ह्यामुळे समाजमन हादरल्याचे निरीक्षण नोंदवत कठोर शिक्षा आवश्यक असल्याचे नमूद केले.
निकालानंतर पीडित कुटुंबीयांनी न्यायव्यवस्थेवर विश्वास व्यक्त करत समाधान व्यक्त केले. राज्यभरातून या निर्णयाचे स्वागत होत असून, महिला आणि बालकांवरील अत्याचार करणाऱ्यांविरोधात अशाच कठोर कारवाईची मागणी नागरिकांकडून होत आहे.
मात्र, कायदेशीर प्रक्रियेनुसार या मृत्युदंडाच्या शिक्षेला उच्च न्यायालयाची पुष्टी आवश्यक असून, त्यानंतरच शिक्षेची अंमलबजावणी होईल.
No comments: